Эдүгээ гурав дахь жилдээ Чингис хаан Үндэсний музейн санаачилгаар "Хаадын зам” арга хэмжээг зохион байгуулж байна.    

ЮНЕСКО-ийн өвд бүртгэлтэй Чингис хааны өлгий нутаг Бурхан Халдунаас Монголын эзэнт гүрний нийслэл Хархорум Орхоны хөндийг холбосон хаад, язгууртны холбоотой соёлын өвийн дурсгалт газруудыг сурталчлан таниулах, түүхэн дурсгалуудыг судлах, аялал жуулчлалын шинэ бүтээгдэхүүн үйлчилгээ, маршрутыг хөгжүүлэх хүрээнд эрдэм шинжилгээ, судалгааны ажлыг хийж буй.                                    

Тус арга хэмжээг Төв аймгийн Мөнгөн-Морьт сумын Хэрлэнгийн Цагаан аралаас эхлүүлж , Төв аймгийн Баяндэлгэр сум Гүн Галуутайд Алтан ургийн язгууртан Их зохиолч Дашдоржийн Нацагдоржийн “Миний нутаг” яруу найргийн наадмын өдөрлөг, Баян сумын Өгөөмөрт Лигдэн хааны ордонд тоглож байсан монгол хаадын хөгжим Чингис хаан Үндэсний музейн дэргэдэх “Хаан найрал” чуулгын тоглолтоор үргэлжилж, “ЮНЕСКО-ийн хүн төрлөхтний соёлын биет бус өвд бүртгүүлсэн хөхүүрийн айраг исгэх уламжлал холбогдох зан үйлийг сурталчилсан “Хаадын ундаа айрагны баяр арга хэмжээ болж, Баянцагаан сумын Чихэртийн зоонд “Хаадын хүлэгч” адуучин тэмцээн, Баян-Өнжүүл сумын “Зоргол хайрхан”-д “Зураачдын нүдээр Зоргол хайрхан” хээрийн үзэсгэлэнг дэлгэж, Дэлгэрхаан суманд Цогт тайжийн хадны бичиг монгол уран бичлэгийн уралдаан зэрэг олон талт арга хэмжээнүүд зохион байгуулагдав.                      

ССАЖЗЯ, Чингис хаан Үндэсний музей, Төв аймгийн СУАЖЗГ, Занабазарын нэрэмжит Дүрслэх урлагийн музей, “Хөх бичиг” Бичиг соёлын академитай хамтран зохион бхйгуулж буй "Хаадын зам 2025” арга хэмжээний хаалт, дүгнэлт хэлэлцүүлэг Өвөрхангай аймгийн Хархорин Орхоны хөндийд өндөрлөнө.                                  

Хаад язгууртны холбоотой түүхэн дурсгалт газруудын талаарх тайлбар мэдээлэл, фото сурвалжлага, арга хэмжээний дэлгэрэнгүй мэдээллийг цувралаар хүргэх болно.