Чингис хаан Үндэсний музей нь 22500 м2 талбайтай, олон улсын стандартад нийцсэн орчин үеийн шийдэл бүхий есөн давхар барилгатай. Үзүүллэгийн нийт 10200 м2 талбай бүхий монголын анхны төрт улсууд, Монголын Их Эзэнт Улс, түүний бүрэлдэхүүний улсууд, XV-ХХ зууны үеийн Монголын хаад язгууртнууд, Дэлхий дахин ба Монголчууд, Их хааны хүндэтгэлийн өргөө зэрэг байнгын үзүүллэгийн нийт 6 танхим, түр үзэсгэлэнгийн 2 танхимтай.

Энэхүү танхим нь хүрэл зэвсгийн үеэс эхлэн Монголын анхны төрт улс Хүннүгийн эзэнт улсын үеийн хосгүй үнэт археологийн ховор чухал дурсгалууд, хаад, язгууртны эдлэл хэрэглэл, чимэглэл, урлаг, сүйх тэрэг, Сяньбийн үеийн Айрагийн гозгорын дурсгалууд, Жужаны хаант улсын хадны оршуулга, Монгол хэлний анхны дурсгал Хүйс толгойн бичээс, Төв Ази дахь хамгийн эртний эмээлүүдийн нэгтэй танилцах боломжтой.

Монгол нутаг дахь эртний нүүдэлчдийн төрт улс Түрэг, Уйгур, монгол угсааны Хятаны хаант улсын үеийн түүх, чулуун дурсгалууд, бичээсүүд, хаад язгууртны булш, бунхан, тахилгын газрын эд өлгийн зүйлс, түүх, соёл, зан заншилтай холбоотой археологийн гайхамшигтай олдворуудыг дэглэн үзүүлж байна. Тус танхимд Шороон бумбагарын дурсгалууд, үйлчин эмэгтэйн хувцас хэрэгсэл, түрэг бичээст хөшөө чулууны эх, хятаны хот суурины үлдэгдэл, 1000 жилийн өмнөх шүдний сойз зэргийг дэглэсэн.

Их эзэн Чингис хаан, түүний угсааныхны угийн бичиг, Рашаан хадны тамга бүхий хөшөө, Хабул хааны баримал, Гүюг хааны тамга, Ромын папад бичсэн захидлын хуулбар, хаад, язгууртны алтан болон болор бүс, монгол хатны хувцас, хэрэгсэл, Чингисийн чулууны бичгийн хуулбар, Мөнх хааны гэрэлт хөшөө, адууны шүдээр хийсэн язгууртны эмээл, эзэнт гүрний цэргийн занданшуулсан шарил, зэр зэвсгийн эх үзмэрүүдийг үзнэ. Мөн Бурхан Халдун уулын видео, язгууртнуудын алт, мөнгөн аяганы бүрэн цуглуулга зэргийг үзүүлнэ.

Монголын эзэнт улсын танхим нь Ази, Европыг дамнасан асар уудам нутгийг эрхшээн Их Юань улс хэмээн нэрлэгдэж түүний харьяанд Оросын нутгийг дамнасан Алтан ордны улс, Киргиз, Узбекстаны нутагт Цагаадайн улс, Иран, Иракын нутагт орших Ил хант улс багтаж байв. Хубилай хааны бичээс, Юаны язгууртны малгай, гутал, луун болон таван нүдэн хээтэй дээл, хатдын малгайн чимэглэл, гоо сайхны хэрэгсэл, хүрэл толь, шаазан эдлэлүүд, Ил хант улсын үеийн сав суулга, торго дурданг дэглэн үзүүлсэн.

Их Юань улсын дараах хаадын уран зураг, хар туг, түүхийн тулгар сурвалж бичгүүд, XVI зууны эцэс үеийн язгууртны хөшөө чулуу, Абтай хааны хуяг, хөрөг, сэлэм, Мандухай сэцэн хатны үеийн аяга, монгол шатар, Өндөр гэгээн Занабазарын урласан 1000 бурхан, Монгол ноёдын захидал бичиг, монгол ноёны манж гүнжийн эдлэл хэрэгсэл, Манж Чингийн язгууртны хувцас, хэрэгсэл, Монгол ноёд, хатдын хувцас, чимэглэл, халхын ноёдын хошуу захирах тамга, Богд хааны төрийн тамга, хувцас хэрэгсэл, Оросын хаанаас Чингисийн угсааны Ерөнхий сайдад өгсөн бэлэг, алтан ургийн ноёдын хөрөг, туг зэргийг үзүүлнэ.

Монголчуудын дэлхий дахины түүхэнд гүйцэтгэсэн үүрэг, байр суурь, монголчуудын бахархлыг харуулсан танхим юм. Тус танхимд монголчуудын хэрэглэж байсан 2000 сум, дуулга, хуяг, Японы эзэн хааны ордны Хубилайн дайны зураг, монгол хаадын захидлын хуулбар, Хархорум хотын дурсгалууд, монголын хаадын зоос, ЮНЕСКО-д бүртгэгдсэн өвийн видео, бичиг үсгийн дурсгалууд, Өндөр гэгээн Занабазарын бүтээлүүд, ногоон дара эх, Монгол язгууртан ноёны гэр өргөө зэргийг багтаан үзүүлж байна.

Уг танхимын хойморт Чингис Их хааны алтан хөшөө заларч, монгол гэрийг бэлгэдсэн орой хэсэг нь тоононы цамхраа, урд талаар эсгий туургатныг илтгэх цагаан туурга, дотор талд нь монгол хаад, язгууртны орд өргөөг төлөөлүүлж загварыг гаргасан шийдэлтэй ёслол хүндэтгэлийн өргөө болно.