Дурсгалын марк нь цаг хугацааны хил даван үндэсний бахархал, соёлын өвийг дэлхий дахинд түгээсээр ирсэн нэгэн соёлын элч юм.

”Монгол бахархлын өдөр”-өөр Өндөр гэгээн Занабазарын мэлмий гийсний 390 жилийн түүхэн ойн хүрээнд үнэ цэнэтэй өвийг бүтээн бий болгосон эрхэм хүмүүнд зориулан дурсгалын марк хэвлүүлэн олон улсын шуудангийн харилцаанд өнөөдрөөс эхлэн түгээж эхэллээ.

Олон улсын шуудангийн харилцаанд түгээх нээлтийн үйл ажиллагаа Чингис хаан Үндэсний музейн “Мөнгөн мод” танхимд (2025.11.21) ёслол төгөлдөр болж, тусгай технологийн блок маркийг олон нийтэд танилцууллаа.

Ийнхүү шинэ маркийн нээлтийн үйл ажиллагааг ССАЖЗ-ийн сайд Ч.Ундрам эхлүүлж “Энэхүү марк нь Өндөр гэгээний хонх очир барьсан шүтээн хөргийг дүрсэлж чимэглэл хэсэгт Занабазарын бэлгэдэл дүрүүдийг бүтээж ар талд нь дэлхийн нийтээрээ эв найрамдалтай амьдрах утга санааг илэрхийлсэн “Жанлавцогзол” номын гол хэсгийг Төвд бичгээр буулгасан нь ихээхэн онцлог” болсон хэмээн тодотгов.

Маркийг бүтээхэд шаазан урлаач Х.Хадхүүгийн уран бүтээлүүдээс дүрслэн, ар талд нь зүрхэн таринуудыг Төвд бичгээр оруулан зураачаар нь Б.Баярхүү, дизайнер Ж.Ганхуяг нар ажилласан байна.

Монгол маркийн түүхэнд 1988 онд “Занабазарын уран бүтээл” сэдэвт долоон нэрийн маркийг гүйлгээнд гаргаж байсан аж.