Чингис хаан Үндэсний музейн “Музейд суралцахуй” боловсролын цогц хөтөлбөр нь музейн үзмэр, үзүүллэгт тулгуурлан, бүтээлч танин мэдэхүйн үйл ажиллагаагаар дамжуулж үзэгчдийн насны онцлогт тохируулан 7 төрлийн хөтөлбөрийг хэрэгжүүлж байна.1️⃣“Хүннүгийн Бэлгэт гөрөөс урлая” баримлын шавар урлалын хөтөлбөр,2️⃣"Буган чулуун хөшөө цутгаж хийх” баримлын хөтөлбөр,3️⃣ "Шороон бумбагарын цагаан бар, бунхны хамгаалагч домгийн амьтан зурах” уран зургийн хөтөлбөр4️⃣ “Их Монгол улсын үеийн язгууртны дээлийг цаасаар урлахуй” цаасан нугалбарын хөтөлбөр5️⃣ “Монголын эзэнт гүрний үеийн хаад язгууртны малгай хийж өмсөх” эсгий урлалын хөтөлбөр6️⃣ “Xоригийн өрөмтэй ваарыг урлах нь” ваар урлалын хөтөлбөр7️⃣ “Сарьдагийн хийдийн язгуурын таван бурхан”-ыг элсээр хэвлэх хөтөлбөрТа бүхэн боловсролын хөтөлбөрт хамрагдахыг хүсвэл 70212222 утсаар холбогдоорой

Чингис хаан Үндэсний музейн “Музейд суралцахуй” боловсролын цогц хөтөлбөр

Монгол Улсын Соёлын яамнаас 2022 оны 11 дүгээр сарыг “Соёлын бүтээлч сар”-аар зарласан. Тус аяны хүрээнд Чингис хаан музей нь “Чингис хаан музей байгуулагдсан түүх” сэдэвт гэрэл зургийн тусгай үзэсгэлэнг 11 дүгээр сарын 01-14-ний өдрийг дуустал олон нийтийн хүртээл болгов.Үзэсгэлэнд 2019 оны долдугаар сарын 3-нд Чингис хаан музейг байгуулах Засгийн газрын 280 дугаар тогтоол гарснаас хойших гурван жилийн хугацаанд бүтээн байгуулалт хэрхэн өрнөснийг харуулсан хоёр баримтат киноны хэсгээс толилуулж, 100 гаруй гэрэл зургийг дэглэн үзүүлсэн юм.&nbsp;

“ЧИНГИС ХААН МУЗЕЙ БАЙГУУЛАГДСАН ТҮҮХ” ГЭРЭЛ ЗУРГИЙН ТУСГАЙ ҮЗЭСГЭЛЭН

2023.3.5-ны өдөр Чингис хаан Үндэсний музейгээр том хүн 1489, хүүхэд 1324, ахмад настан 420, гадаад том хүн 9, тусгай хэрэгцээт иргэн 17, оюутан 171, нийт 3430 иргэн үйлчлүүлэв. Боловсролын хөтөлбөрт 211 хүүхэд хамрагдав. Нийт үзэгчдийн 40 гаруй хувь нь насанд хүрсэн иргэд байлаа.Монгол орон даяар 2023 оны гуравдугаар сарын 1-5-ны хооронд өрнөсөн Музейн нээлттэй өдрүүдэд Чингис хаан Үндэсний музей нь нийт 18094 үзэгчдэд хүрч үйлчлэв.Музейн хамгаалалтад Чингэлтэй дүүргийн Цагдаагийн I хэлтсийн Нийгмийн хэв журмыг хамгаалах тасгийн 87 албан хаагч, Эрүүгийн цагдаагийн газрын Халаасны хулгайтай тэмцэх хэлтсийн 3 албан хаагч нийт 4 өдөр үүрэг гүйцэтгэж, хамтран ажиллав.Чингэлтэй дүүргийн Цагдаагийн газраас “Хамгаалалтын үед гарсан зөрчил дутагдалгүй, үйл ажиллагаатай холбоотой дуудлага, мэдээлэл, хулгай, танхайрах гэмт хэрэг зөрчил бүртгэгдээгүй” гэж, мөн Засгийн газрын Иргэд, олон нийттэй харилцах 11 11 төвөөс “Одоогийн байдлаар гомдол бүртгэгдээгүй” гэж мэдэгдлээ.Эдгээр өдрүүдэд Чингис хаан Үндэсний музейн нийт албан хаагчид нягт зохион байгуулалтад орж, тусгай хуваарийн дагуу өндөр ачаалалтай ажиллахдаа хүн төвтэй, тэгш хүртээмжтэй байж, музейн үзүүллэгийн танхим дахь ачааллыг тэнцвэржүүлэн, үзмэрийн хадгалалт хамгаалалтын горимыг баримталж, чийг дулааныг тохируулж, үзэгчдийг төрөл бүрийн соёл, боловсролын арга хэмжээнд хамруулан, цэгцтэй, дэг журамтай, соёлтой үйлчлүүлэхэд санаа тавьж ажиллав.Тухайлбал, 1000 гаруй үзэгчээс сэтгэл ханамжийн судалгаа (ярилцлага, анкет судалгаа) авч, санал хүсэлтийн дэвтэр ажиллуулж, үзэгчдийг музейгээр үйлчлүүлэхийн өмнө музейн ерөнхий танилцуулга, музей үзэх соёлын талаар зөвлөмж өгч ажиллалаа.СОЁЛТОЙ, СОЁЛЫН ӨВӨӨ ДЭЭДЛЭН ДЭГ ЖУРАМТАЙ ҮЙЛЧЛҮҮЛСЭН ЭРХЭМ ҮЗЭГЧДЭДЭЭ БАЯРЛАЛАА.

МУЗЕЙН НЭЭЛТТЭЙ ӨДРҮҮДЭД ЧИНГИС ХААН ҮНДЭСНИЙ МУЗЕЙ НЬ НИЙТ 18094 ҮЗЭГЧДЭД ХҮРЧ ҮЙЛЧЛЭВ

Чингис хаан Үндэсний музейгээс 2023 оны хоёрдугаар сарын 17-ны 14:00 цагт “Монголын эзэнт гүрний сүр хүчний бэлгэ тэмдэг” тусгай лекцийг олон нийтэд нээлттэй зохион байгуулах гэж байна. Энэхүү лекцийг Чингис хаан Үндэсний музейн зочин судлаач А.Г.Юрченко унших бөгөөд цаашид тус музей олон нийтэд зориулан эрдэмтэн, судлаачдын тусгай лекцийг сар бүр тогтмол зохион байгуулах болно.Та бүхнийг хүрэлцэн ирэхийг урьж байна.

“МОНГОЛЫН ЭЗЭНТ ГҮРНИЙ СҮР ХҮЧНИЙ БЭЛГЭ ТЭМДЭГ” ТУСГАЙ ЛЕКЦИЙГ ЗОХИОН БАЙГУУЛНА  

Их эзэн Чингис хааны мэлмий гийсний 860 жилийн ой, Монгол бахархлын өдөр Чингис хаан музейд “МОНГОЛ ОРОН МОНГОЛЧУУД” (ГЭРЭЛ ЗУРАГ ДАХЬ МОНГОЛЧУУД) цуврал 10 боть номын 9, 10 дугаар ботийн нээлт, “ТҮҮХЭН ГЭРЭЛ ЗУРАГ НЬ МОНГОЛЫН ТҮҮХИЙГ СУДЛАХ ЭХ СУРВАЛЖ БОЛОХ НЬ” олон улсын эрдэм шинжилгээний хурал, “ЧИНГИС ХААНЫ УГСААНЫ ХААД, ЯЗГУУРТНУУД ТҮҮХЭН ГЭРЭЛ ЗУРАГТ” танилцуулга үзэсгэлэнгийн нээлтээс бүрдсэн цогц арга хэмжээ амжилттай болж өндөрлөлөө.

“ЧИНГИС ХААНЫ УГСААНЫ ХААД, ЯЗГУУРТНУУД ТҮҮХЭН ГЭРЭЛ ЗУРАГТ”

Хөгжлийн бэрхшээлтэй хүнд хүртээмжтэй 2022 оны шилдгүүдийг шалгаруулах ёслолын ажиллагаа 2023 оны нэгдүгээр сарын 14-ний өдөр Төрийн ордонд болов.Чингис хаан Үндэсний музейн барилга байгууламж нь Монгол Улсад мөрдөгдөж буй барилгын стандартаар Хөгжлийн бэрхшээлтэй иргэдийн хэрэгцээ, техникийн шаардлага, стандартуудыг бүрэн хангасан учир “Хөгжлийн бэрхшээлтэй хүнд хүртээмжтэй оны шилдэг бүтээн байгуулалт” төрөлд нэр дэвшсэн 20 гаруй байгууллагаас шилдгээр тодорлоо.

2022 ОНЫ "ХӨГЖЛИЙН БЭРХШЭЭЛТЭЙ ХҮНД ХҮРТЭЭМЖТЭЙ ОНЫ ШИЛДЭГ БҮТЭЭН БАЙГУУЛАЛТ"-ААР ЧИНГИС ХААН ҮНДЭСНИЙ МУЗЕЙ ШАЛГАРЛАА

Чингис хаан Үндэсний музейн захирал, академич С.Чулуун 2023 оны хоёрдугаар сард ОХУ-ын Санкт-Петербург хотноо ажиллаж, Эрмитаж Улсын музейтэй хамтын ажиллагааны анхны гэрээгээ албан ёсоор байгууллаа. Тус гэрээнд хамтарсан үзэсгэлэн зохион байгуулах, эрдэм шинжилгээний хээрийн шинжилгээний болон судалгааны бүтээл туурвих, мэргэжилтэн солилцох, бэлтгэх асуудлууд багтсан байна. Ийнхүү Соёлын сайд Ч.Номин, ОХУ-ын Соёлын сайд, хатагтай Любимова Ольга Борисовна нарын 2021 оны 12 дугаар сард Москва хотноо байгуулсан хамтран ажиллах санамж бичиг, 2022 оны Худалдаа, Эдийн засаг, Шинжлэх Ухаан, техникийн хамтын ажиллагааны Монгол, Оросын Засгийн газар хоорондын комиссын протоколын 8.12, 13 дахь заалтыг хэрэгжүүлж Чингис хаан Үндэсний музей, Эрмитаж Улсын музейтэй хамтран ажиллахаар тогтлоо. Эрмитаж музейн сан хөмрөгт Монгол Улсад холбогдолтой баялаг дурсгалууд хадгалагдаж байгаа бөгөөд Чингис хаан Үндэсний музейн захирал, академич С.Чулуунаар ахлуулсан баг “Эрмитаж дахь Ноён уулын дурсгал”, “Эрмитаж дахь Хархорум хотын өв”, “Эрмитаж дахь Бурханы шашны өв”, “Эрмитаж дахь Монголын эзэнт гүрний өв” хэмээх дөрвөн боть бүтээлийг хэвлүүлээд байгаа юм. Үүнээс гадна, 2023 онд дахин нэг боть бүтээл хэвлүүлэхэд бэлэн болоод байна. Эдгээр дурсгалыг эрдэм судалгаа, танин мэдэхүйн хэрэгцээнд зориулан анх удаа цогцоор нь хэвлэн нийтэлсэн гэдгээрээ онцлогтой. Чингис хаан Үндэсний музей, Эрмитаж музейтэй хамтран ажиллахаас гадна Оросын Угсаатны музей, Дорно дахины ард түмний урлагийн музей, Их Петр хааны нэрэмжит Угсаатан, хүн судлалын музей, ШУА-ийн Дорно дахины гар бичмэлийн хүрээлэнтэй мөн хамтын ажиллагааны гэрээ байгуулж, Монголын соёлын өвтэй холбоотой судалгааг өргөжүүлэх, боловсон хүчнийг бэлтгэх, хамтарсан үзэсгэлэн гаргах, Монголын түүхэнд урьд хэвлэгдээгүй ховор сонин баримт, дүрс бичлэг, гэрэл зургуудыг нийтийн хүртээл болгохоор ажиллаж байна. Түүнчлэн “Монголчуудын соёлын өв: Архивын баримт, гар бичмэлийн цуглуулга” олон улсын хурлыг зургаа дахь удаагаа зохион байгуулж байгаа бөгөөд 2023 оны дөрөвдүгээр сард Монгол Улсад, 11 дүгээр сард Санкт-Петербург хотноо Ноён уулын малтлагын 100 жилийн ойд зориулсан эрдэм шинжилгээний хурлыг зохион байгуулахаар төлөвлөн ажиллаж байна.

ЧИНГИС ХААН ҮНДЭСНИЙ МУЗЕЙ ОХУ-ЫН ЭРМИТАЖ УЛСЫН МУЗЕЙТЭЙ ХАМТЫН АЖИЛЛАГААНЫ ГЭРЭЭ БАЙГУУЛЛАА

Музей нь тухайн улс, үндэстний соёлын өв, үнэт олдвор, түүхэн эх сурвалжуудыг хадгалан хамгаалж, олон нийтэд үзүүлэх төдийгүй өв соёл, түүх, үндэсний бахархал, үнэт зүйлээ судлах өнгөрсөн, одоо, ирээдүй цагийн холбоос, судлагдахууны гол хэрэглүүр, хэрэглэгдэхүүн болдгоороо албан ба албан бус боловсролын орчны салшгүй хэсэг юм.Энэхүү агуулгын хүрээнд Чингис хаан Үндэсний музей, Боловсролын ерөнхий газар, Нийслэлийн боловсролын газраас хамтран “Музей - Боловсролын орчин” сэдэвт хэлэлцүүлгийг 2023 оны нэгдүгээр сарын 11-ний 09:00 цагаас танхим, онлайн хосолсон хэлбэрээр зохион байгуулах гэж байна.Хэлэлцүүлэгт оролцох ерөнхий боловсролын сургуулийн 180 гаруй багшийг Нийслэлийн боловсролын газар онлайнаар бүртгэсэн. Бүртгүүлсэн багш нараас гадна музейн удирдлагууд, боловсролын ажилтнуудыг тус хэлэлцүүлэгт өргөнөөр оролцохыг урьж байна.

“МУЗЕЙ - БОЛОВСРОЛЫН ОРЧИН” СЭДЭВТ ХЭЛЭЛЦҮҮЛГИЙГ ТАНХИМ, ОНЛАЙН ХОСОЛСОН ХЭЛБЭРЭЭР ЗОХИОН БАЙГУУЛНА

Чингис хаан Үндэсний музей олон нийтэд 2022 оны 10 дугаар сарын 12-ноос албан ёсоор үүд хаалгаа нээснээс хойш “Музейд суралцахуй” боловсролын цогц хөтөлбөрийг хэрэгжүүлж байна. 2022 оны 12 дугаар сарын байдлаар тус музейг нийт 58000 гаруй үзэгч үзсэний 35000 буюу 60 хувь нь сургуулийн насны хүүхдүүд байна. Үүнээс тусгай хэрэгцээт 110 үзэгч үзсэнээс боловсролын хөтөлбөрт 7 үзэгч хамрагдсан.&nbsp; Монгол Улсад тэгш хамруулах боломжийг хангасан бүх нийтийн насан туршийн боловсролыг дэмжих тухай Тогтвортой хөгжлийн зорилго 4-д тусгаснаар “хүүхэд бүрийг чанартай боловсрол эзэмших эрхийг хангах” заалтын дагуу музейн боловсролын хөтөлбөрийг нас, сэтгэхүйн онцлогт тохируулан хэрэгжүүлж байна.&nbsp;Чингис хаан Үндэсний музей нь хүүхэд бүрт тэгш хүртээмжтэй боловсролыг олгох зорилгоор хүүхдийн болон насан туршийн боловсролын хоёр танхимаар үйлчилж, одоогийн байдлаар тусгай хэрэгцээт иргэдийг дэмжих хэрэгсэл, зориулалтын ширээ, сандлыг байршуулаад байна. Цаашид олон улсын стандартад нийцсэн тусгай хэрэгцээт иргэдийн боловсролыг дэмжих хэрэгслүүдийг бүрэн хангах төлөвлөгөөтэй ажиллаж байгаа бөгөөд 2023 онд тусгай хэрэгцээт иргэдэд зориулсан олон улсын байгууллагуудтай хамтран төсөл хөтөлбөрүүд хэрэгжүүлэхээр ажиллаж байна.

ЧИНГИС ХААН ҮНДЭСНИЙ МУЗЕЙ ТЭГШ ХАМРУУЛАХ БОЛОВСРОЛ (ТХБ)-Д ЧИГЛЭСЭН ОЛОН ТАЛТ ҮЙЛ АЖИЛЛАГААГ ЗОХИОН БАЙГУУЛНА

Архангай аймгийн Өндөр-Улаан сумын нутаг дахь Гол мод II дурсгалт газрын Хүннүгийн язгууртны 189 дүгээр булш хэдийгээр эвдэгдэн хөндөгдөж, тонуулчдын гарт өртсөн боловч тэндээс цул мөнгөн цутгамал хос луу илэрч олдсон байдаг. Алтан шармал хос эвэр, далавч, зогдор бүхий энэхүү хос мөнгөн лууг АНУ-ын Археологийн институтээс эрхлэн гаргадаг Archаeology сэтгүүлээс “2019 оны дэлхийн шилдэг 10 археологийн нээлт”-ийн нэгээр зарласан билээ.

ХҮННҮГИЙН ЯЗГУУРТНЫ БУЛШНААС ИЛЭРЧ ОЛДСОН АЛТАН ШАРМАЛ ХОС МӨНГӨН ЛУУ

Үндэсний эрх чөлөө тусгаар тогтнолоо сэргээсний баярын өдрийг тохиолдуулан Чингис хаан Үндэсний музейгээс олон нийтэд зориулсан “ТУСГААР ТОГТНОЛЫН ТУХАЙ ШИНЭ БАРИМТУУД: ХААН БА ЯЗГУУРТНУУД" тусгай лекцийг зохион байгууллаа.Өөрийн олон жилийн судалгааны ажил, түүхийн шинэ баримтуудад үндэслэсэн сонирхолтой лекцийг уншиж сонордуулсан Төрийн шагналт, Түүхийн шинжлэх ухааны доктор О.Батсайхан танд талархал илэрхийлж цаашдын эрдэм судлалын их үйлсэд тань амжилт хүсье.Лекцэнд хүрэлцэн ирсэн үзэгчид, сонсогчдодоо Чингис хаан Үндэсний музейн хамт олны зүгээс талархал илэрхийлье.Чингис хаан Үндэсний музей нь олон нийтэд зориулсан тусгай лекцийг тогтмол зохион байгуулах болно.

Мэдээ, мэдээлэл